Γένεσις, κεφ. 16 (κείμενον Ο΄)
Γένεσις
ΚΕΦΑΛΑΙΟΝ 16
[Λόγος 18ος]
1 Σάρα δὲ γυνὴ ῎Αβραμ οὐκ ἔτικτεν αὐτῷ. 1β ἦν δὲ αὐτῇ παιδίσκη Αἰγυπτία, ᾗ ὄνομα ῎Αγαρ. 2 εἶπε δὲ Σάρα πρὸς ῎Αβραμ· «᾿Ιδοὺ συνέκλεισέ με Κύριος τοῦ μὴ τίκτειν· 2β εἴσελθε οὖν πρὸς τὴν παιδίσκην μου, ἵνα τεκνοποιήσωμαι ἐξ αὐτῆς». 2γ ὑπήκουσε δὲ ῎Αβραμ τῆς φωνῆς Σάρας. 3 καὶ λαβοῦσα Σάρα ἡ γυνὴ ῎Αβραμ ῎Αγαρ τὴν Αἰγυπτίαν τὴν ἑαυτῆς παιδίσκην, 3β μετὰ δέκα ἔτη τοῦ οἰκῆσαι ῎Αβραμ ἐν γῇ Χαναάν, ἔδωκεν αὐτὴν τῷ ῎Αβραμ ἀνδρὶ αὐτῆς αὐτῷ γυναῖκα. 4 καὶ εἰσῆλθε πρὸς ῎Αγαρ, καὶ συνέλαβε. 4β καὶ εἶδεν ὅτι ἐν γαστρὶ ἔχει, καὶ ἠτιμάσθη ἡ κυρία ἐναντίον αὐτῆς. 5 εἶπε δὲ Σάρα πρὸς ῎Αβραμ· «᾿Αδικοῦμαι ἐκ σοῦ· 5β ἐγὼ δέδωκα τὴν παιδίσκην μου εἰς τὸν κόλπον σου, 5γ ἰδοῦσα δὲ ὅτι ἐν γαστρὶ ἔχει, ἠτιμάσθην ἐναντίον αὐτῆς· 5δ κρίναι ὁ Θεὸς ἀνὰ μέσον ἐμοῦ καὶ σοῦ». 6 εἶπε δὲ ῎Αβραμ πρὸς Σάραν· «᾿Ιδοὺ ἡ παιδίσκη σου ἐν ταῖς χερσί σου· 6β χρῶ αὐτῇ ὡς ἄν σοι ἀρεστὸν ᾖ». 6γ καὶ ἐκάκωσεν αὐτὴν Σάρα, καὶ ἀπέδρα ἀπὸ προσώπου αὐτῆς.
7 Εὗρε δὲ αὐτὴν ἄγγελος Κυρίου ἐπὶ τῆς πηγῆς τοῦ ὕδατος ἐν τῇ ἐρήμῳ, ἐπὶ τῆς πηγῆς ἐν τῇ ὁδῷ Σούρ. 8 καὶ εἶπεν αὐτῇ ὁ ἄγγελος Κυρίου· «῎Αγαρ, παιδίσκη Σάρας, πόθεν ἔρχῃ καὶ ποῦ πορεύῃ;» 8β καὶ εἶπεν· «᾿Απὸ προσώπου Σάρας τῆς κυρίας μου ἐγὼ ἀποδιδράσκω». 9 εἶπε δὲ αὐτῇ ὁ ἄγγελος Κυρίου· «᾿Αποστράφηθι πρὸς τὴν κυρίαν σου καὶ ταπεινώθητι ὑπὸ τὰς χεῖρας αὐτῆς». 10 καὶ εἶπεν αὐτῇ ὁ ἄγγελος Κυρίου· «Πληθύνων πληθυνῶ τὸ σπέρμα σου, καὶ οὐκ ἀριθμηθήσεται ὑπὸ τοῦ πλήθους». 11 καὶ εἶπεν αὐτῇ ὁ ἄγγελος Κυρίου· «᾿Ιδοὺ σὺ ἐν γαστρὶ ἔχεις καὶ τέξῃ υἱὸν 11β καὶ καλέσεις τὸ ὄνομα αὐτοῦ ᾿Ισμαήλ(1), ὅτι ἐπήκουσε Κύριος τῇ ταπεινώσει σου. 12 οὗτος ἔσται ἄγροικος ἄνθρωπος· αἱ χεῖρες αὐτοῦ ἐπὶ πάντας, καὶ αἱ χεῖρες πάντων ἐπ᾿ αὐτόν, 12β καὶ κατὰ πρόσωπον πάντων τῶν ἀδελφῶν αὐτοῦ κατοικήσει». 13 καὶ ἐκάλεσεν ῎Αγαρ τὸ ὄνομα Κυρίου τοῦ λαλοῦντος πρὸς αὐτήν· «Σὺ ὁ Θεὸς ὁ ἐπιδών με», 13β ὅτι εἶπε· «Καὶ γὰρ ἐνώπιον εἶδον ὀφθέντα μοι». 14 ἕνεκεν τούτου ἐκάλεσε τὸ φρέαρ «Φρέαρ οὗ ἐνώπιον εἶδον»· 14β ἰδοὺ ἀνὰ μέσον Κάδης καὶ ἀνὰ μέσον Βαράδ.
15 Καὶ ἔτεκεν ῎Αγαρ τῷ ῎Αβραμ υἱόν, 15β καὶ ἐκάλεσεν ῎Αβραμ τὸ ὄνομα τοῦ υἱοῦ αὐτοῦ, ὃν ἔτεκεν αὐτῷ ῎Αγαρ(2), ᾿Ισμαήλ. 16 ῎Αβραμ δὲ ἦν ἐτῶν [ὀγδοηκονταέξ], ἡνίκα ἔτεκεν ῎Αγαρ τῷ ῎Αβραμ τὸν ᾿Ισμαήλ.
Παραπομπαί
16. 1) 12:16· 15:2,3· 21:9,10,12· 21:9-21· 25:21. Λκ 1:7,36. Γαλ 4:24 (καὶ 4:21-31).
2) 3:1-6,12,17· 15:4· 17:16· 18:10· 20:18· 25:21· 30:1,2,3,6,9,22. Εξ 21:4. Ρθ 4:11. 1Βασ 1:5-6. Ψ 126:3.
3) 12:4,5· 16:5· 25:6· 28:9· 30:4,9· 32:22· 35:22. 2Βασ 5:13. 3Βασ 11:3. Γαλ 4:25.
4) 1Βασ 1:6-8. 2Βασ 6:16. Πρμ 30:20,21,23. 1Κορ 4:6· 13:4,5.
5) 21:10-19· 31:53. Εξ 5:21. 1Βασ 24:12-15. 2Παρ 24:22. Ψ 7:8· 34:23· 42:1. Λκ 10:40,41.
6) 13:8,9· 24:10· 30:1. Εξ 2:15. Ψ 105:41,42. Ιωβ 2:6. Πρμ 14:29· 15:1,17,18· 27:8· 29:19. Εκ 10:4. Ιερ 45(38):5. 1Πετ 3:4,7.
7) 25:18. Εξ 15:22· 1Βασ 15:7. Πρμ 15:3.
8) 3:9· 4:10· 16:1,4. Εξ 23:20-23. 1Βασ 26:19. Εκ 10:4. Ιερ 2:17,18. Εφ 6:5-8. 1Τιμ 6:1,2.
9) Εκ 10:4. Εφ 5:21· 6:5,6. Ττ 2:9. Φλμ 8-21. 1Πετ 2:18-25· 5:5,6.
10) 12:2· 17:20,26· 21:13-18· 22:15-18· 25:12-18· 31:11-13· 32:24-30· 48:15,16. Εξ 3:2-6. Ψ 82:6,7. Ησ 63:9. Ωσ 12:3-5. Ζχ 2:8,9. Μλχ 3:1. Ιω 1:18. Πρξ 7:30-38· 1Τιμ 6:16.
11) 17:19· 29:32-35· 41:51,52. Εξ 2:23,24· 3:7. 1Βασ 1:20. Ψ 21:24. Ιωβ 38:41. Ησ 7:14. Μτ 1:21-23. Λκ 1:13,31,63.
12) 21:20· 25:12-18.
13) 16:7-10· 22:14· 28:17-19· 31:42· 32:30. Εξ 33:18-23· 34:5-7. Ψ 138:1-12. Πρμ 5:21· 15:3.
14) 24:62· 25:11. Αρ 13:26. Δευτ 1:19.
15) 16:11· 17:18,20,25,26· 21:9-21· 25:9,12· 28:9· 37:27. 1Παρ 1:28. Γαλ 4:22,23.
16) 12:4· 16:3.
Σημειώσεις 16ου κεφαλαίου
(1) Κατά τινα ἑρμηνείαν, ᾿Ισμαὴλ = ῾Ο Θεὸς ἀκούει.
(2) ῾Ετέρα γραφή· τοῦ γενομένου αὐτῷ, ὃν ἔτεκεν ῎Αγαρ,
᾿Εξηγήσεις συμβόλων καὶ στοιχείων